UTOAJI HAKI MAHAKAMANI

Pamekuwapo na malalamiko kutoka kwa baadhi ya wananchi, hata katika vyombo vya habari, kuwa, mahakama imetoka katika nafasi yake ya kutoa haki na badala yake inachangia haki kupotea. Jambo hili si la kujivunia kwa mhimili wa dola ambao unategemewa kutoa haki kwa anayepaswa kupewa haki hiyo. Katika utafiti huu yametolewa maoni mbalimbali ya kuonesha chanzo cha tatizo hili huku wananchi wakidai kuwa, baadhi ya mahakimu hawatimizi wajibu wao kwa vile wana kinga ya kutoshtakiwa wakati wakitekeleza wajibu wao, hivyo, kufanya wapendavyo bila woga. Baadhi ya watu wamesema kuwa, kutokana na mabadiliko ya hali ya uchumi na siasa duniani, basi, hakimu kama mmojawapo wa wanajamii anapaswa aambatane na upepo wa mabadiliko hayo. Katika utafiti huu napenda kukiri kuwa, nimejikita zaidi katika Kinga ya Mahakimu na Jinsi ya Kuirekebisha. Katika sura ya kwanza ya Utafiti huu, mwandishi ameonesha mada ambayo aliifanyia utafiti huku akirejea historia yake kwa ufupi, lengo la utafiti, uwanda wake pamoja na nadharia ya uwajibikaji. Soma kitabu hiki upate ufafanuzi zaidi.