SAYANSI YA MIMEA YA MAZAO

Duniani kuna viumbe vya aina mbili. Aina ya kwanza ni viumbe visivyo na uhai, kwa mfano, hewa na mawe. Aina ya pili ni viumbe vyenye uhai. Viumbehai navyo vinaweza kutengwa katika makundi mawili, yaani mimea na wanyama. Mimea na wanyama hutegemeana. Chakula kikuu cha wanyama ni mimea mbalimbali pamoja na mazao yatokanayo na mimea. Kwa hiyo, tunaona kwamba wanyama hutegemea mimea kwa chakula. Bila mimea wanyama wote muhimu watatoweka duniani. Kwa upande mwingine, kinyesi cha wanyama pamoja na mabaki kadhaa yanayopatikana wakati wakifa au kuchinjwa hutengeneza mboji ambayo ni chakula bora cha mimea. Mboji hiyo vilevile ni ya manufaa makubwa kwa udongo pamoja na viumbe vingine viishivyo undongoni. Viumbe hivi huiwezesha mimea kustawi zaidi. Kwa hiyo, tunaweza kusema pia kwamba mimea hutegemea wanyama kwa mahitaji yake ya chakula. Mimea nayo inaweza kutengwa katika makundi mawili: kundi la kwanza ni mimea ambayo hustawishwa na binadamu kwa madhumuni ya kupata mazao. Hii huitwa mimea ya mazao. Kundi la pili ni mimea isiyostawishwa na binadamu kwa ajili ya kupata mazao. Kitabu hiki kinahusu Sayansi ya Mimea, na hasa Mimea ya Mazao.